لهفة الوجدان

حبيبي مالها معنى سوى انك ناوي النسيان
اجل قلي مراسيلي وش الطاري تجافيها

وش تسمي علاقتنا وحبل الوصل في نقصان
قطاعه نارها ابقلبي امانه وش تسميها

فهمتك من زمن لكن توقعتك تجي ولهان
تحن بالليلة قمرا صفاتك هي مواريها

على بالي غلاي اكبر من اللي كان واللي كان
تجيني بالهوى مشتاق وعين الشوق ترضيها

غريبه شلت من بالك تبادر في هوى الشفقان
وهو من كان لك غنوه لحنها في معانيها

كتبها من حبر دمه وصار اسمك لها عنوان
ولا غيرك قدر يسمع صدى من هو يغنيها

غرامك دوم بعيونه يعانق لهفة الوجدان
يظم اجمل حروف الحب على مرسى موانيها

حبيبي بس اهي كلمه تساوي باللألوف اثمان
من شفاهك تجي بلسم ترد انفاس مغليها

احبك حطها بقوسين وردد في غلاها الحان
وقلي في حمى القوسين عن اللي هو طرى فيها

انا ادري ما طرى ابالك ولا عمرك هويت انسان
رداة الحظ لا طاحت تهد اعلى مبانيها

ياحظك ما عرفت الهم ولا ذقت الهموم الوان
ولاعمرك سهرت الليل تعاني حر صاليها

حبيبي حكمة ايامك حلاة الشي بالفقدان
حلاته ندرة اوقاته وقل احلام معطيها

ياخوفي من بعد بكره تجي تبكي تجي ندمان
على اللي فاقد اشواقه عقب ما كان مرويها

وذاك الوقت ماينفع وطير الحب بالجنحان
كفخ لأرض بها غيرك يقدر كل امانيها

حبيبي مالها معنى سوى انك ناوي النسيان
اجل قلي مراسيلي بدون اسباب تجافيها ؟