عشق بلورة

تأملت الجمال اللي خلقه الله بـها الصوره
لقيت إن الجمال يفوق ضعف اللي تصورته

أسرني بالعيون شعور يسابق لهفته نوره
و أنا بكلي تلقيته ولا دري شلون صافحته

خذاني من بحر حزني ولملمني على بحوره
وظم أجمل معاني الشوق وقبلني وقبلته

أناظر وش على المبسم أشوف الموت بحضوره
شفايف كنها جمره ولهيب الجمر آنسته

يذوب المسك بالخدين يذوب الورد وعطوره
ويتوه النور لا عانق جمال اللي تأملته

ظلام الليل بالقذله سماه نجوم منثوره
حرير ناعم الملمس لذيذ إحساس لامسته

ولون البهجه بالفستان عليه زهور محفوره
دفاه يدق بعروقي ويغني القلب ما قلته

وخيط الصبح بالجبهة ضحك واستبشر سروره
وهام بطلته واقبل نذير الحب وعانقته

وعانقت الرضى وياه وصار الشوق دستوره
سعاده مالها آخر وهذا الحلم حققته

وداعاً ياحزن عمري سنين الدمع وشهوره
وداعاً قلتها بقلبي ما دام الهم كفنته

ما دامه روح في روحي و روحي تسكن شعوره
بشيل الراية البيضاء و أقول الحب تعلمته

حقيقه والغلا باني من قصوري على قصوره
شموخ يبهر الناظر تتوه العين لا شفته

ويبقى بخاطري نشوه تهيم بعشق بلوره
و أهيم بكل ما فيني غرام بود سامرته

ومن يسئل عن الصوره تراها عيون (….)
جـمال صافح عـيوني و لا بعـمري تصـــورته