عطر وتحايا

آه يا حظ المرايا شافت عيونك يا روحي
وآه يا حظك نظرتي صورتك وسط المرايا

وآه يا حظ الزوايا عطرها منّك يفوحي
يسلب العاشق ويسرح بين لوعات الزوايا

وآه يا حظ الهدايا في سماء جوك تلوحي
ضمت الفرحة وذابت يوم تقبلها هدايا

القمر شفته تجرأ وأرسل انواره وضوحي
يعلن بجرأه غرامه ويفضح اللي بالحنايا

قبّل الخد وتمادى وزاد فيني بالجروحي
ليتني املك شعاعه واحتوي كلك عطايا

ادري انك لي حبيبه و (الغلا) بعينك فضوحي
رسم واضح من جبينك فاعل بقلبك سوايا

وادري انك لي بنيتي قصر شامخ له صروحي
معتلي قمة مشاعر عالية بحسن النوايا

وادري انك لي كتبتي وأجمل حروفك تبوحي
(مذهله) بخط الأنامل لو كتبتيها خفايا

وادري أني قلت احبك قلتها بالحظه مزوحي
والإجابة إيه احبك صادقه بعذب السجايا

آه يا حظي وحظي دام قلبك لي نصوحي
دامك أنتي لي هدية فوقها عطر و تحايا

وآه يا حظي وحظك نملك اللهفة طموحي
نملك الدنيا مودة ونترك القسوة بقايا

اكتفي باللي كتبته والعشم (كلك) سموحي
سامحي حبري ونقشي لو بدا منّه خطايا

واقبلي كل المشاعر وافيه يا روح روحي
واذكري أني بقلبك لا وقفتي للمرايا